Компанијата Microsoft планира да ја ребрендира својата апликација за десктоп, Your Phone која се користи за поврзување на мобилни уреди кои ги користат оперативните системи Android или iOS. Отсега оваа апликација ќе постои под името Phone Link. Покрај тоа, Microsoft планира и да го промени името на својата мобилна апликација, така што повеќе нема да се вика Your Phone Companion, туку Link to Windows.
Microsoft планира да го подобри и интерфејсот и корисничкото опкружување во апликацијата Phone Link за да биде повеќе во согласност со изгледот на Windows 11 системот. А дополнителна функционалност се очекува преку нови можности за комуникација помеѓу уредите кои работат на различни оперативни системи.
Microsoft ја претстави апликацијата Your Phone пред три години. Таа им овозможува на корисниците пристап до фотографии, текстуални пораки и апликации присутни на нивните мобилни уреди со Android или iOS преку своите компјутери.
Најсеопфатна интерграција и најпотполна функционалност, Your Phone апликацијата оствари со мобилните уреди на Samsung, а одлична поддршка е достапна и за мобилниот уред на самиот Microsoft – Surface Duo. Од пред неколку дена, Microsoft додаде и поддршка за неколку мобилни уреди на компанијата Honor.