Huawei одржа настан на кој го претстави својот нов флексибилен смартфон Mate Xs 2 за глобалниот пазар, како и неколку паметни часовници и фитнес-тракери.
Mate Xs 2 доаѓа на европските пазари во јуни, ќе биде достапен во бела, црна и виолетова боја, а ќе чини 1.999 евра. Овој паметен телефон на преклоп се продава на кинескиот пазар од април.
Уредот има 7,8-инчен OLED екран со резолуција од 2480 x 2200 пиксели и стапка на освежување од 120Hz, а кога е преклопен/затворен корисникот има 6,5-инчен екран кој е поудобен за користење со една рака.
И покрај неговата големина, Mate Xs 2 тежи 255 грама, што е значително помалку од неговиот претходник Mate Xs (300 грама) и Mate X2 (295 грама). Новиот паметен телефон го покренува Snapdragon 888 4G процесорот на Qualcomm, поврзан со 8 GB RAM и 512 GB внатрешна меморија.
Одзади се наоѓа главна камера од 50 MP, ултраширока од 13 MP и телефото камера од 8 MP со оптички зум 3x. Однапред е сместена селфи камера од 10,7 MP. Капацитетот на батеријата изнесува 4.600 mAh и поддржува брзо полнење од 66 W.