За престојната iPhone 14 серија смартфони на Apple веќе подолго време се шпекулира, а сега протече информација дека новите уреди ќе бидат претставени на 13. септември.
Извори блиски до компанијата од Купертино открија дека Apple ќе одржи медиумски настан на 13. септември, кога ќе бидат претставени новите смартфони од iPhone 14 серијата, освен доколку компанијата поради некоја причина не одлучи да го промени постоечкиот план.
Покрај четири iPhone 14 модели, вклучувајќи ги iPhone 14, iPhone 14 Max, iPhone 14 Pro и iPhone 14 Pro Max, Apple ќе го претстави и паметниот часовник Apple Watch 8 со својата Extreme Edition верзија, поевтниот Apple Watch SE 2 модел, AirPods Pro 2 безжичните слушалки и нов модел на iPad.
Со оглед на големиот број уреди, можно е дека Apple ќе одлучи да организира два настани, како што тоа беше случај во 2020 година. Пред две години беа преставени новите iPad и Apple Watch уреди, пред iPhone уредите кои беа објавени во октомври. Во тој случај, новите iPhone модели веројатно би изостанале од настанот закажан за 13 септември.
Apple обично една недела однапред официјално ги најавува своите настани, па може да се очекуваат некои конкретни информации на 6. септември.