Веб-прелистувачот на Apple, Safari стана втор браузер кој има повеќе од милијарда корисници, што значи дека го користат речиси 20 проценти од интернет корисниците во светот.
Овие бројки ги објави Atlas VPN кој спроведе истражување за да ги идентификува најкористените прелистувачи во светот. Иако Safari ја надмина „магичната“ граница, сепак не е ни блиску до Google Chrome и неговите колосални бројки.
Atlas VPN извлече податоци од GlobalStates и InternetWorld Stats, а според нивните бројки, Google Chrome има повеќе од 3,3 милијарди корисници ширум светот. Ова значи дека Chrome поседува нешто повеќе од 64 проценти од вкупниот пазар на прелистувачи. Потоа следуваат Safari, Microsoft Edge, Firefox и Samsung Internet.
Microsoft Edge го користат повеќе од 212 милиони корисници, што е околу 4 проценти од пазарот. Firefox има нешто повеќе од 179 милиони корисници и поседува околу 3 проценти од пазарот. Во случајот на Samsung Internet, овој веб-прелистувач има речиси 150 милиони корисници или 2,85 отсто од пазарот.
Atlas VPN ја припишува популарноста на прелистувачите на нивната безбедност и достапност, но во случајот на Chrome, корисниците се привлечени од дизајнот. Google има многу популарни апликации како YouTube, Google Maps и Google Drive кои луѓето често ги користат. Поради овие апликации, корисниците пробуваат други услуги на Google и на крајот го преземаат Chrome.
Успехот на Safari се заснова на фактот дека доаѓа на сите iPhone и Mac компјутери и е популарен поради безбедносните карактеристики, вклучително и Intelligent Track Prevention, функција која го спречува слењдењето на корисниците на веб-страниците.
