Microsoft во голема мера го спроведува својот план за укинување на Internet Explorer, како што беше најавено минатата година, а крајниот датум е утрешниот ден – 15 јуни. Компанијата објави пред повеќе од една година дека Explorer ќе биде отстранет од Windows 10, додека неговата надградба во Windows 11 не беше ни вклучена.
Internet Explorer првпат се појави во 1995 година, како дел од Windows 95. Во раните 2000-ти години, Internet Explorer го држеше речиси целиот пазар. Познатиот прелистувач беше на својот врв во 2003 година со 95 отсто удел на пазарот. Потоа дојдоа Firefox и Opera, кои самите почнаа да се борат за својот дел.
Пресвртот дојде во 2009 година во време кога луѓето почнаа да очекуваат повеќе од нивните десктоп прелистувачи, а Мајкрософт не сакаше да додаде модерни функции. Тоа беше и годината кога Google го објави Chrome, што предизвика остар пад во користењето на Internet Explorer.
Chrome го имаше истиот пазарен удел како Internet Explorer до 2012 година, кога го остави прелистувачот на Microsoft, но и на сите други – “во прашина”.
Во 2016 година, Microsoft престана да го развива на сметка на новиот прелистувач Edge.
Бројот на корисници исто така е значително намален поради зголемената популарност на мобилните оперативни системи – Android и iOS, кои не поддржуваа Internet Explorer.
