Елон Маск за првпат им се обрати на вработените во Twitter и ја соопшти неговата визија за компанијата.
Извршниот директор на Tesla и SpaceX им соопшти на вработените дека сака да го зголеми бројот на корисници на услуги од 229 милиони на најмалку милијарда луѓе.
Тој додаде дека рекламирањето ќе остане важно за компанијата и покрај тоа што претходно изјави дека смета дека Twitter не треба да прикажува реклами.
„Мислам дека рекламирањето е многу важно за Twitter. Не сум против тоа. Веројатно би разговарал со огласувачите и би рекол да се погрижиме рекламите да бидат што е можно позабавни”, изјави Маск.
За време на состанокот, Маск не понуди вести за финализирање на договорот за преземање, но повтори дека се обидува да дознае повеќе за лажните профили кои се негова најголема грижа.
Тој рече дека социјалната мрежа ќе има слобода на говор, вработените ќе можат и понатаму да работат од дома, но преферира повеќето од нив да се вратат во канцеларија.
