Како што е тоа традиција, Apple намерно изостави некои детали од презентацијата за iPhone 14 серијата минатата недела. Пред сè, мислиме на количеството на RAM меморија и капацитетот на батеријата. Веќе дознавме колку RAM меморија имаат iPhone 14 моделите , а сега дознаваме и какви батерии имаат четирите членови од iPhone 14 серијата.
Минатата недела беше потврдено дека сите четири нови модели имаат 6GB RAM. Некои гласини укажуваат дека Pro моделите имаат LPDDR5 RAM, а обичните модели LPDDR4X, но тоа не е потврдено.
На презентацијата на новите уреди, Apple објави дека iPhone 14 серијата нуди „целодневно траење на батеријата“, а за iPhone 14 Plus беше истакнато дека се работи за iPhone со најдолго траење на батеријата досега. Сајтот Macrumors сега ги открива големините на батериите за сите четири модели од iPhone 14 серијата.
Во извештајот се наведува дека ги добиле деталите за батериите за сите нови смартфони преку кинеската регулаторна база на податоци. Според информациите, капацитетите на батериите за iPhone 14 серијата се како што следува:
- iPhone 14: 3,279 mAh
- iPhone 14 Plus: 4,325 mAh
- iPhone 14 Pro: 3.200 mAh
- iPhone 14 Pro Max: 4,323 mAh
За споредба, iPhone 13 mini има батерија од 2.406 mAh, iPhone 13 поседува батерија од 3.227 mAh, iPhone 13 Pro има батерија од 3.095 mAh, додека iPhone 13 Pro Max содржи батерија од 4.352 mAh.
Значи, iPhone 14 пристигнува со незначително поголем капацитет на батерија во споредба со неговиот претходник. iPhone 14 Pro носи малку поголемо подобрување во однос на претходниот модел, додека iPhone 14 Pro Max има малку помала батерија од iPhone 13 Pro Max . iPhone 14 Plus има најголема батерија и речиси сигурно ќе понуди најдобра автономија од сите iPhone 14 модели.