Услугата Firefox Relay е дизајнирана да им помогне на корисниците да ги задржат спамерите надвор од мејл сандачето, а Firefox Relay Premium ги чува несаканите повици и пораки подалеку од вашиот телефонски број.
Relay е услуга на Firefox која ќе ја скрие вашата вистинска адреса на е-пошта за да го заштити вашиот идентитет и да спречи вашето сандаче да биде преплавено со спам. До услугата може да се пристапи преку адресата relay.firefox.com или со користење на истоимениот додаток за веб-прелистувачот.
Со користење на бесплатната услуга, добивате пристап до пет виртуелни мејл адреси. Firefox Relay ќе ги проследи вашите е-пораки од вашите алијас адреси до вашата примарна адреса за е-пошта, а од компанијата наведуваат дека не ја складираат или читаат нивната содржина.
За сите оние на кои не им се доволни пет алијас адреси, има премиум услуга чија цена изнесува две евра месечно (или едно евро месечно кога се плаќа годишно).
Премиум услугата за е-пошта е моментално достапна во САД, Германија, Велика Британија, Канада, Сингапур, Малезија, Нов Зеланд, Финска, Франција, Белгија, Австрија, Шпанија, Италија, Шведска, Швајцарија, Холандија и Ирска.
Дополнително, се нуди и виртуелен телефонски број (кој не може да се промени откако ќе се избере), т.е. услуга за маскирање телефонски броеви која нуди 50 минути дојдовни повици и 75 SMS пораки месечно по цена од околу пет евра месечно.
Во блог постот на Mozilla се наведува дека нивната услуга може да се користи за одговарање на пораките на последниот испраќач, но не и за појдовни повици или испраќање пораки до некого (иако наводно планираат да ја понудат таа услуга во иднина).
Оваа функција на телефонски број засега е ексклузивна за САД и Канада, пренесува The Verge.