Alienware 25 (AW2523HF) гејминг мониторот, XPS 13 Plus лаптопот и Dell Pro Webcam се нови производи на популарниот американски производител Dell.
Alienware 25 (AW2523HF)
Според Dell, новиот гејминг монитор Alienware 25 е оптимизиран за esports услови, што значи дека може да се пофали со функции за натпреварувачки видео игри. Така, на пример, доаѓа со 25-инчен IPS екран со Full HD резолуција, стапка на освежување од 360 Hz, поддршка за AMD FreeSync Premium технологијата и VESA AdaptiveSync сертификат.
Мониторот има и подобрен дизајн Legend 2.0 со хексагонална основа за помала работна површина, кој тврдат од Dell, треба да им обезбеди на гејмерите подобра флексибилност кај поставувањето на тастатурата и повеќе простор за движење на глувчето. Има и интегрирана „закачалка“ за слушалки.
XPS 13 Plus Developer Edition
XPS 13 Plus е прв лаптоп на производителот што поседува Ubuntu 22.04 сертификат и доаѓа со однапред инсталиран Ubuntu 22.04 LTS. Бидејќи се работи за лаптоп наменет за програмери, од Dell наведуваат дека вклучува и специфичен софтвер и управувачки програми кои се разликуваат од останатите.
Dell Pro Webcam
Заедно со гејмерскиот монитор и лаптопот за програмери, Dell претстави и веб-камера со 2K QHD резолуција. Dell Pro веб-камерата има Sony STARVIS сензор и објектив со повеќе елементи, како и функции за Digital Overlap HDR и Facial Detection Auto Exposure за оптимизирање на дисплејот.
Камерата има и технологија за обработка на сигнали за слика и 3D/2D намалување на шумот за автоматско отстранување на матни слики. За подобро фокусирање и следење на корисникот, постои и функција AI Auto Framing. Сето ова е спакувано во компактно куќиште, кое содржи и специјален микрофон за намалување на шумот, магнетна обвивка за приватност и штипка за прицврстување на монитор, лаптоп или држач.
Веб-камерата на Dell Pro е компатибилна со оперативните системи Windows и Mac, а е сертифицирана и за Microsoft Teams и Zoom. Камерата може да се приспособи со помош на софтверот Dell Peripheral Manager.