Како што се приближува 2023 година, така се ближи и лансирањето на Samsung Galaxy S23 серијата. Новите уреди треба да бидат претставени на почетокот на следната година. Најновиот извештај ни донесува нови детали за оваа серија, поконкретно за најмоќниот модел, Galaxy S23 Ultra.
Кога станува збор за составот на серијата, таа не би требало да донесе промена во однос на годинешната Galaxy S22 . Значи се очекуваат Samsung Galaxy S23, Galaxy S23+ и Galaxy S23 Ultra.
Неодамна беше откриено дека Galaxy S23 Ultra ќе го има истиот перископ сензор од 10 MP со 10x зум, како и телефото модул од 10MP со 3x оптички зум.
Познатиот дојавувач Ice Universe сега ги сподели најновите инфации за Galaxy S23 Ultra моделот, во кои наведува дека смартфонот ќе креира многу подобри телефото фотографии. Тој истакнува дека Samsung ги подобрил боите и одредени алгоритми за вештачка интелигенција, што ќе доведе до подобрување на квалитетот на фотографиите. Секако, софтверот забележа огромен напредок во последниве години, што Samsung максимално го користи.
Неодамна, Galaxy Club откри дека Galaxy S23 Ultra ќе пристигне со сензор за главната камера од 200 MP. Се разбира, ова не мора да значи подобри фотографии, но сигурно ќе му овозможи на телефонот да сними повеќе детали. Samsung веќе претстави сензор за камера од 200 MP, така што беше само прашање на време кога и некој уред на Samsung ќе го добие овој сензор.
Што се однесува до другите детали за уредот, се очекува тој да има речиси идентичен дизајн како неговиот претходник. Единствените помалку забележливи разлики се тоа што двете помали камери на задната страна немаат испакнатини, а екранот е нешто помалку заоблен во однос на претходникот.
Телефонот се очекува да го покренува се уште ненајавениот Snapdragon 8 Gen 2 чип.