Корисниците на Asus Zenfone 9 ќе го добијат ажурирањето на Android 13 веќе во декември оваа година. Сите оние кои ги користат гејмерските ROG модели ќе мора да имаат трпение.
Asus на Twitter го објави официјалниот план за воведување на Android 13 на своите мобилни телефони. Листата е прилично кратка, но тоа не е изненадувачки, бидејќи тајванската компанија на корисниците им ветува само две големи ажурирања.
Прв на ред е Asus Zenfone 9, кој ќе добие Android 13 веќе овој декември. По него следуваат моделите Zenfone 8 и Zenfone 8 Flip, на кои ова ажурирање се очекува во јануари 2023 година. Со надградбата на новиот Android, целата серија Zenfone 8 престанува да има официјална поддршка.
Понатаму, популарните гејмерски телефони на Asus, ROG Phone 6 и 6 Pro ќе го добијат Android 13 во првиот квартал од 2023 година. Корисниците на малку постарата серија ROG Phone 5 може да го очекуваат ова ажурирање само три месеци подоцна, односно во вториот квартал на следната година.