Покрај Xiaomi 13 серијата, кинеската компанија вчера го претстави и MIUI 14. Новата верзија на корисничкиот интерфејс на Xiaomi е базирана на Android 13, а пристигнува со многу визуелни промени, неколку нови функции и подобрено поврзување помеѓу повеќе уреди.
Xiaomi наведува дека MIUI 14 има намалена големина на фирмверот во споредба со MIUI 13 и носи подобрена системска архитектура. Новиот интерфејс ќе има подобрени перформанси, но и ефикасност. Барем така тврди Xiaomi.
Дизајн
MIUI 14 доаѓа со значителни промени во дизајнот. Компанијата направи промени на иконите, но и на целокупниот интерфејс. Иконите се поголеми и нивната големина може да се прилагоди, а има и нови формати на виџети и фолдерина почетниот екран, како и повеќе можности за прилагодување. Покрај тоа, MIUI 14 нуди и нови виџети за домашни миленици и растенија.
Перформанси
На презентацијата, Xiaomi посвети големо внимание на перформансите. Од компанијата изјавија дека се работи на тоа софтверот да биде „полесен“. Бројот на претходно инсталирани апликации е значително намален и сега има само осум апликации што не може да се деинсталираат. Xiaomi тврди дека флуидноста на системот е подобрена до 60%, а апликациите од трети страни, исто така, наводно ќе понудат подобрени перформанси и ефикасност.
Карактеристики
Она што прво го карактеризира MIUI 14 во споредба со неговиот претходник е неговата мала големина. Така, вкупната големина на фирмверот е 13,09 GB, што е многу помалку во споредба со претходните верзии. Има и нова функција за чистење апликации, а MIUI 14 донесува и нови опции за управување со известувањата. Сега корисниците ќе можат да ги затвораат постојаните известувања со само едно повлекување. Исто така, новоинсталираните апликации ќе бараат известување за авторизација. Приватноста е исто така подобрена без складирање на кориснички податоци на мрежата и сите дејства се вршат локално на уредот.
AI карактеристики
MIUI 14 сега нуди опција за издвојување на текст од фотографиите, а поддржани се до 8 јазици. Тука е и функцијата за титлови во живо за видео конференции итн. Значајни подобрувања се направени и кај гласовниот асистент Mi AI, кој сега може да се користи за скенирање документи, преведување и филтрирање несакани повици.
Поврзување
MIUI 14 овозможува значително подобро поврзување помеѓу повеќе уреди на Xiaomi. Компанијата наведува дека повеќе од милијарда уреди сега се поддржани од два главни центри за меѓусебно поврзување. Xiaomi Magic Center служи за управување со сите производи на Xiaomi.
Семејни услуги
Xiaomi наведува дека MIUI 14 нуди различни семејни услуги, како што се создавање фото албуми со тесен круг на луѓе, споделување здравствени податоци, како и разни родителски контроли.