Во студијата спроведена на мозоци на три различни видови на насукани делфини, откриено е дека тие имаат маркери за човечка Алцхајмерова болест.
Насукувањето на делфините не е ретка појава. Китовите и делфините често се собираат во групи на плажите и плитките води. Понекогаш тимови од експерти успеваат да ги вратат овие морски животни во длабочините и на тој начин да ги спасат, но многу од нив умираат. Додека примарните причини за заглавувањето се нејасни, истражувањето кое се обидува да ја реши оваа мистерија е во тек.
Истражувачите од Универзитетот во Глазгов, Сент Ендрјус и Единбург, како и од Истражувачкиот институт Моредун во Шкотска, со анализа на мозоците на 22 делфини, откриле дека некои од нив содржат клучни промени поврзани со Алцхајмерова болест. Станува збор за пет видови на делфини, а секој од нив имал маркери на споменатата болест.
„Бев заинтересиран да одговорам на прашањето дали само луѓето страдаат од деменција. Нашето истражување покажува дека потенцијалната патологија поврзана со деменција не е единствена само за луѓето“, вели коавторот на студијата, професорот Френк Ган-Мур од Универзитетот во Сент Ендрјус.
Податоците од истражувањето би можеле да понудат одговор на феноменот на заглавување. Научниците рекоа дека резултатите би можеле да ја поддржат теоријата за „болен водач“, во која здрава школа на делфини се наоѓа во опасно плитки води следејќи водач на групата кој се збунил или изгубил.
Животните биле анализирани за да се бараат „знаци“ на Алцхајмерова болест, а резултатите откриле дека мозокот на постарите животни содржи амилоид-бета плаки, но и други патологии поврзани со деменција. Ова јасно покажува дека одредени видови на делфини развиваат невропатологија слична на Алцхајмеровата болест.
„Ова се значајни наоди кои за прв пат покажуваат дека патологијата на мозокот на заглавените делфини е слична на онаа на човечкиот мозок со Алцхајмерова болест. Во оваа фаза, примамливо е да се шпекулира дека присуството на лезии на мозокот укажува дека делфините може да страдаат од когнитивните недостатоци поврзани со Алцхајмеровата болест кај луѓето, но потребни се повеќе истражувања за подобро да се разбере што се случува во случајот со животните“, рече д-р Марк Даглиш од Универзитетот во Глазгов.
Сепак, истражувањето не е дефинитивна потврда дека животните страдале од истите когнитивни дефекти забележани кај Алцхајмеровата болест кај луѓето.
„Фасцинирани сме да гледаме промени во мозокот на постарите делфини бидејќи тие се слични на оние кај постарите луѓе, како и во случајот со Алцхајмерова болест. Дали овие патолошки промени придонесуваат за насукање на делфините е интересно и важно прашање за понатамошната работа“, изјави професорката Тара Спајрс-Џонс од Универзитетот во Единбург.
