Научници од Универзитетот во Алберта развија облека што може да ги убие вирусите и бактериите со кои доаѓа во контакт.
Облеката е наменета за пожарникари и полицајци, а е изработена од ткаенина за самодеконтаминација. Овој материјал би можел да има и поширока употреба за сите видови униформи.
„Сакаме да ја направиме оваа технологија ефикасна и компатибилна со процесите на производство во индустриски размери, а тоа е многу голем предизвик“, рече научникот Патриша Долес, која е експерт за текстил на Факултетот за земјоделство, наука за животот и животната средина.
Проектот е фокусиран на подобрување на краткорочните и долгорочните перформанси на завршната обработка на ткаенината истражуван од Долес и нејзините колеги Џејмс Харинук и Џејн Бечелер. Целта е широкото индустриско производство да биде економски изводливо. Работата беше поддржана со програма од милион долари од Министерството за национална одбрана. Во процесот на доработка се користат N-халамини, соединенија кои можат брзо и ефикасно да ги убијат бактериите и вирусите и лесно да се нанесат на текстилот. Овој спој е погоден за сите заштитни униформи, може да го носат сите, од војници и пожарникари до медицински работници.
„Ова решение може да се користи за сета заштитна облека, па дури и за маски за лице, што е дополнителен начин за заштита на оние што се грижат за нас“, вели Долес.
Системот за полнење кој е потребен за реактивирање на завршпната обработка нанесена на текстилот е исто така во развој. Овој систем вклучува натопување на облеката во раствори што содржат хлор, како што е белилото.
Бидејќи војниците на терен немаат секогаш пристап до проточна вода или машини за перење, потребен е лесен начин за заштита на нивната облека ако се наоѓаат на оддалечени локации.
„Сакаме да развиеме систем со минимален отпечаток кој не е гломазен и тежок и е лесен за употреба. Може да биде прашок или течност“, додаде таа.
Истражувачите се здружија со канадската компанија Logistik Unicorp Inc. која управува со синџири на снабдување за низа корпоративни и државни клиенти ширум светот кои користат заштитна облека. Нивната цел е да ја приспособат технологијата на потребите на оние кои први излегуваат на терен.
„Тие се консултираат со своите клиенти, што дава сеопфатен поглед на нашето истражување што не е ограничено на една текстилна технологија или апликација. Ова ќе ни помогне да го најдеме најдобриот производствен процес за нашето решение“, додаде таа.
Во мај 2020 година, истражувачите од најмалку два универзитета тврдеа дека користеле технологија за „електрични“ маски што може да го неутрализира коронавирусот. Тие демонстрираа „електрична ткаенина“ што всушност го убива коронавирусот при контакт.