Google Project Zero пронајде 18 активни пропусти во Samsung Exynos модемите, доволно за хакерите да добијат целосен пристап до вашиот телефон.
Project Zero, истражувачки тим во рамките на Google, откри сериозни пропусти во Samsung Exynos чиповите, особено нивните модеми.
На неодамна објавениот блог, тие истакнаа дури 18 пропусти, а четири од пријавените 18 безбедносни проблеми се всушност толку сериозни што може да им дозволат на хакерите да пристапат до некои модели само со телефонски број.
Практиката е истражувачите да не откриваат ранливости додека не се решат. Меѓутоа, овој пат ситуацијата е малку поинаква, бидејќи се чини дека Samsung не брза премногу да ги реши овие проблеми.
Меди Стоун, член на тимот на Project Zero објави твит во кој се наведува дека корисниците сè уште немаат добиено закрпа дури и 90 дена по пријавувањето на проблемите.
Истражувачите составија листа на телефони, други уреди, па дури и возила кои се ранливи на хакирање поради овие пропусти:
- Samsung Galaxy S22, M33, M13, M12, A71, A53, A33, A21, A13, A12 i A04 сериите
- Vivo S16, S15, S6, X70, X60 и X30 сериите.
- Pixel 6 и Pixel 7 сериите.
- Сите носечки уреди кои користат Exynos W920 чипсет.
- Сите возила кои користат Exynos Auto T5123 чипсет.
Што се однесува до Pixel телефоните, Google веќе ги поправи проблемите со серијата Pixel 7 со неодамнешното ажурирање во март. Сепак, закрпата сè уште не е пристигната за Pixel 6, Pixel 6 Pro и Pixel 6a, што значи дека овие телефони сè уште се ранливи.
За оние кои ги купиле своите S22 телефони со Snapdragon чипсет (надвор од Европа), ова не важи, бидејќи овој проблем не се јавува кај моделите на Qualcomm, додека сите модели на листата што се продаваат во Европа имаат потенцијален проблем.
Додека чекаме Samsung и другите производители да ги решат проблемите, Google препорачува да ги исклучите повиците преку Wi-Fi и Voice-over-LTE (VoLTE) доколку имате некој од наведените уреди.