Еден ден пред официјалната премиера на Xiaomi 13 Ultra, компанијата одлучи да открие како ќе изгледа уредот, потврдувајќи ги неодамна објавените фотографии. Како што може да се види, уредот вклучува голема кружна површина за главната камера, која се наоѓа во испакнат дел од задниот панел. Ова значително ја зголемува дебелината на телефонот на врвот – се шпекулира дека изнесува 15,61 мм.
Уредот ќе има метална странична рамка и задна плоча со облога од вештачка кожа која е антибактериска и поотпорна на нечистотија, како и на пожолтување. Обликот на уредот е дефинитивно карактеристичен и едвај чекаме да дознаеме што се крие зад него – веројатно овој дизајн е поврзан со четирите користени сензори од 50 MP, од кои едниот е 1-инчен. Смартфонот ќе има и зелена верзија.
Покрај тоа, компанијата откри дека уредот ќе користи и нов материјал за AMOLED дисплејот – тој се нарекува C7 и е развиен заедно со кинеската компанија TCL Huaxing. Според Xiaomi, ова ќе му овозможи на 13 Ultra да испорача врвна осветленост од 2.600 нита, што е исклучително импресивно. Очекуваме уредот да понуди дисплеј од 6,7 инчи со стапка на освежување до 120 Hz.
