Safari е веб-браузер на компанијата Apple, кој доаѓа со секој Mac, iPhone и iPad уред, но и покрај тоа, второто место минатата година го држеше Edge
Во последните неколку месеци, прелистувачот Microsoft Edge често беше во центарот на вниманието. Пред сè, поради новите алатки за вештачка интелигенција што почна да ги поддржува, откако Microsoft го интегрираше ChatGPT во добар дел од своите производи. Меѓу нив приоритет се Edge и Bing со цел дополнително да се зголеми нивната популарност. Сепак, се чини дека тоа не беше доволно за да се остане на второто место на ранг-листата на најпопуларни интернет прелистувачи, бидејќи таа позиција сега ја зазема Apple Safari.
Statcounter, платформа која ја следи употребата на интернет прелистувачи на различни веб-локации, известува дека Google Chrome сè уште е најкористениот десктоп прелистувач во светот, со 66,13 проценти од од пазарот.
Safari ја врати својата позиција на втор најпопуларен прелистувач, со 11,87% од корисниците кои го користат редовно. Microsoft Edge е веднаш зад Safari со 11 отсто, пренесува 9to5mac.
Листата изгледа вака:
- Google Chrome: 66.13%
- Safari: 11.87%
- Microsoft Edge: 11%
- Firefox: 5.65%
- Opera: 3.09%
- Internet Explorer: 0.55%
Google Chrome се уште најранлив
Во меѓувреме, Atlas VPN откри дека Google Chrome бил најранливиот веб-прелистувач минатата година, со 303 пријавени пропусти досега. Всушност, Chrome го држи рекордот како најранлив на малициозни напади, бидејќи моментно има вкупно 3.159 пријавени безбедносни пропусти.
Спротивно на тоа, Safari имаше малку такви проблеми низ годините. И покрај тоа што неодамна достигна над една милијарда корисници и стана вториот најпопуларен прелистувач во светот, Safari имаше само 26 документирани безбедносни пропусти во првите три квартали од 2022 година.