На својата WWDC 2023 конференција за програмери, Apple ја најави и најновата верзија на својот десктоп оперативен систем, кој го носи името macOS Sonoma.
Клучните нови функции вклучуваат поддршка за виџети на десктоп, нов режим за игри, како и подвижни скринсејвери. Ажурирањето познато и како macOS 14, наскоро треба да биде достапно во бета верзија за програмерите, а во следните недели и како во јавна бета за сите корисници. Општата достапност се очекува некаде наесен оваа година.
Виџетите можат да се повлекуваат од Notification Center на десктоп или да се преземат од iPhone преку Continuity функцијата, доколку уредите се поврзани на иста Wi-Fi мрежа. Тие можат да бидат интерактивни (можно е да се обележат ставки од листата на задачи или да се контролира репродукцијата на музика или поврзаните паметни домашни уреди), а исто така се дизајнирани да се „стопат“ во позадина кога ќе се отвори некој прозорец.
Има и нов Game Mode за Mac кој е дизајниран да ѝ даде приоритет на играта во пристапот до ресурсите на процесорот и графиката, но и да го намали доцнењето во случај на поврзаните AirPods слушалки и Xbox и PlayStation контролери. Apple вели дека овој начин на работа ќе функционира со сите наслови. За да ја потврди својата посветеност на игрите, Apple исто така беше домаќин на програмерот на игри, Хидео Коџима, кој преку стрим го најави доаѓањето на играта „Death Stranding Director’s Cut“ на macOS.
Подобрена е и видео-конференциската врска, а претставена е и функцијата Presenter Overlay која овозможува содржината да се прикажува во поп слајдшоу зад вас додека лицето останува на камерата. Заедно со сетот на реакции со AR ефекти кои можат да се активираат за време на повик, овие функции очигледно може да се користат во која било апликација за видео конференции.
Новата верзија на оперативниот систем донесува и безбедносни надградби на Safari, поддршка за повеќе профили во веб-прелистувачот на Apple, како и можноста секоја веб-страница да се претвори во веб апликација, која ќе може да смести на док и да се однесува како посебна апликација на десктоп.
