Samsung на својот сајт во Австралија прерано објави соопштение за следниот Galaxy Unpacked настан, на кој се очекува да бидат претставени новите преклопни смартфони на компанијата
Неодамна се појавија индикации дека Samsung ќе го одржи својот следен Galaxy Unpacked настан на домашен терен во Сеул, Јужна Кореја. Сега тоа е потврдено и со објава од компанијата во Австралија, која во меѓувреме беше отстранета. Веројатно по грешка информацијата е објавена порано, и откако беше избришана, може да се види кеширана верзија.
Специфичната локација е COEX во областа Самсеонг-Донг, а во соопштението се наведува дека тоа е уникатно место кое го прикажува минатото и иднината на Сеул. Настанот ќе се одржи на крајот на јули, што ги потврдува претходните гласини. Компанијата досега избираше локации во Европа и САД за одржување на Galaxy Unpacked настаните .
Премиери се одржаа во Барселона, Берлин, Лондон и Њујорк. Компанијата вели дека со следниот настан ја менува својата стратегија во однос на премиерите на своите уреди на преклопување и планира да ги организира во различни популарни градови низ светот кои одговараат на избраната тема.
Samsung не сподели што ќе биде претставено, но имаме прилично добра идеја за тоа. На настанот во Сеул очекуваме да ги видиме преклопните Galaxy Z Flip5 и Galaxy Z Fold5, кои ќе имаат ново дизајнирани шарки и поцврста и поелегантна конструкција на преклопување.
Промените ќе овозможат уредите да се затвораат без празнина меѓу двата дела, а помалку забележливa ќе биде и браздата на средината на екранот. Уредите најверојатно ќе користат Snapdragon 8 Gen 2 For Galaxy процесори, а се очекува и многу поголем надворешен дисплеј кај Galaxy Z Flip5.
Покрај овие модели, очекуваме на настанот да бидат претставени и Galaxy Watch 6 и Galaxy Watch 6 Classic паметните часовниците, како и таблет уредите Galaxy Tab S9, Galaxy Tab S9+ и Galaxy Tab S9 Ultra. Останува да видиме дали компанијата ќе го следи примерот на Apple и ќе претстави свој уред за проширена реалност.