Оние кои имаат намера да ја купат конзолата Xbox Series X треба да го сторат тоа пред август, бидејќи Microsoft ќе ги зголеми цените. И тоа не е се.
Xbox Series X ќе биде поскап во повеќето земји од август, во Канада ќе чини 650 канадски долари, 489 фунти во Велика Британија, 800 австралиски долари во Австралија и 550 евра во повеќето европски земји. Овие зголемувања се приближно во согласност со промените во цената за конзолата PlayStation 5, што Sony ги направи на повеќето пазари минатата година. Покрај тоа, цените за претплата на Game Pass исто така ќе се зголемат.
„Ги одржувавме цените на нашите конзоли многу години и ги прилагодувавме за да ги одразуваат конкурентските услови на секој пазар. Промените во цените на Game Pass не се поврзани со договорот со Activision Blizzard и се наменети да одговараат на условите на локалниот пазар“, рече шефот за комуникации на Xbox, Кари Перез.
Цените на Xbox Series S остануваат исти на сите пазари, а Microsoft наскоро ќе претстави црн модел со 1 TB меморија по цена од 349 долари.
Microsoft повеќе не креира игри за Xbox One, но оние кои не сакаат да купат Series X или S сепак ќе можат да ги играат претстојните игри како Sartield и Fable, но преку Game Pass Ultimate. Сепак, ќе се зголеми и цената на оваа услуга.
Xbox Game Pass ќе чини 11 долари наместо 10 долари, а Game Pass Ultimate ќе чини 17 долари, во однос на претходните 15 долари. Цената на PC Game Pass останува 10 долари откако се зголеми од 5 долари месечно во 2020 година. Треба да се напомене дека цената на Xbox Game Pass нема да се зголеми во Норвешка, Чиле, Данска, Швајцарија и Саудиска Арабија.
Промените на цените за новите членови на Xbox Game Pass ќе стапат на сила на 6 јули и нема да важат за постоечките претплатници до 13 август во САД или 13 септември во Германија. Оние со годишна претплата ќе ја плаќаат „старата“ цена додека не дојде време да си ја обноват претплатата.