По неколкумесечни шпекулации, Apple официјално потврди дека годишниот настан за претставување на iPhone ќе се одржи во вторник, 12 септември 2023 година.
Компанијата почна да испраќа покани за медиумскиот настан, кој го носи насловот „Wonderlust“, а традиционално ќе започне во 19 часот по македонско време. Како и обично, ќе се пренесува во живо преку веб-страницата на компанијата и официјалниот YouTube канал.
Ѕвезди на вечерта ќе бидат смартфоните од серијата iPhone 15, во која очекуваме повторно да има четири модели. Поевтините iPhone 15 и 15 Plus многу ќе личат на нивните претходници, но ќе добијат Dynamic Island. Од друга страна, iPhone 15 Pro и 15 Pro Max би можеле да донесат поголеми промени – се шпекулира дека ќе нудат титаниумски рамки, дисплеи со потенки рамки и A17 Bionic чипсет. Се очекива iPhone 15 Pro Max да има и камера со поголем оптички зум. Сите модели ќе имаат USB-C портови, наместо Lightning приклучок.
Wonder awaits. September 12. #AppleEvent pic.twitter.com/48gRXu3Ux4
— Greg Joswiak (@gregjoz) August 29, 2023
Освен нови телефони, се очекува и ажурирање на Apple Watch паметните часовници. Watch Series 9 ќе понуди модели од 41mm и 45mm, а покрај нив ќе има и нова верзија на Watch Ultra. Како што објавивме неодамна, промените во новите часовници ќе бидат мали, но компанијата подготвува голем редизајн следната година, за да се совпадне со десетгодишнината од претставувавањето на првиот Apple Watch. Покрај тоа, на настанот се очекува и ажурирана верзија на AirPods слушалките со USB-C порт.