Скопје ќе биде домаќин на експерти од големи светски компании
Сѐ е подготвено за 6. јубилејно издание на Конференцијата за е-трговија која ќе се одржи во вторник (14.11), во Националната опера и балет во Скопје, под мотото „Редефинирање на е-трговијата со вештачка интелигенција”.
Врвни и еминентни експерти од големите светски брендови Мета, Заландо, Нестле, Алегро, но и претставници од едни од најуспешните регионални бизниси ќе бидат дел од најавената висококвалитетна програма кои преку предавања, панел дискусии и разговори ќе ги пренесат своите експертизи и искуства од областа на е-трговијата, вештачката интелигенција, дигитализацијата и дигиталниот маркетинг.
Конференцијата и годинава има регионален карактер и истата е најголема досега – на истата ќе присуствуваат повеќе од 600 гости – успешни претприемачи, е-трговци, директори и менаџери на компании и владини претставници од Македонија, Србија, Босна и Херцеговина, Албанија, Косово, Црна Гора и Бугарија што ја прави уникатна и единствена во регионот во своето шесто издание.
„Конференцијата за е-трговија стана најпосетуван бизнис настан од овој тип во Македонија и регионот. Огромниот број на присутни и распродаденоста на билетите на 6 дена пред конференцијата го потврдува токму тоа. Организирањето на овој настан пред сѐ е огромна чест и задоволство бидејќи истиот е од високо значење за понатамошен раст и развој на е-трговијата во земјава и регионот. Големиот интерес за овој настан е резултат на посветен тим со стремеж кон перфекција, кој секогаш има за цел да креира најдобро искуство за присутните, обезбедувајќи им можност да се стекнат со нови, свежи знаења и да се поврзат и запознаат со нивни истомисленици за креирање на нови бизнис соработки.“ – вели Виктор Стојкоски, Генерален секретар на Асоцијацијата за е-трговија на Македонија, кои се организатори на овој настан.
Како дел од програмата официјално ќе се споделат податоци од годишниот преглед на анализата за е-трговија за 2023 година, ќе се зборува и за важноста на податоците, маркетингот и вештачката интелигенција како потпора за успешен бизнис со е-трговија, влијанието на „маркетплејс“ платформите во секторот на е-трговија, но и за значењето на беспрекорното искуство со интернет плаќањата и меѓуграничната достава на интернет, а ќе бидат споделени и искуства од успешните е-трговци во регионот.
Пред присутните гости свои поздравни обраќања ќе имаат претседателот на Р.С. Македонија, Стево Пендаровски, НЕ Петра Дрекслер, амбасадорка на Сојузната Република Германија во С. Македонија, Штефан Худолин, раководител за соработка во Делегацијата на ЕУ во С. Македонија, како и Нина Ангеловска, претседателка на Асоцијацијата за е-трговија.
Покрај новата локација оваа година новост е и иновативниот пристап за активација на таканаречениот саемски дел каде што присутните ќе имаат можност одблиску да се запознаат со присутните компании, што ќе биде дополнителна можност за вмрежување и споделување на искуства, но и добивање на вредни подароци од спонзорите на конференцијата. Исто така, оваа година содржината на конференцијата, планирањето, агендата, и креативната комуникација на социјалните медиуми и на денот на самиот настан се креираа со помош на вештачка интелигенција. Овој иновативен пристап ја издвојува конференцијата од традиционалните настани и ја носи на едно повисоко ниво, заедно со нејзината интензивна регионална промоција низ целиот Западен Балкан.
Инаку, минатата година конференцијата за е-трговија беше домаќин на преку 500 учесници од 150 компании, организации, универзитети и владини институции од земјата и од регионот, а свои презентации имаа 30 говорници од 10 земји.
Дека македонските компании се заинтересирани за унапредување на познавањата од областа на е-трговијата, говори фактот дека сите влезници за овогодишното издание беа целосно распродадени една недела пред почетокот на конференцијата.
Конференцијата е поддржана од Германското друштво за соработка – ГИЗ како организациски партнер, Мастеркард како генерален партнер, А1 Македонија како дигитален партнер, Ананас и НЛБ Банка како златни партнери и Комерцијална банка, Корпа, Пивара Скопје, Геники Таксидромики, Фит Кит, Халкбанк, Фешн Груп и Филип Морис Тутунски Комбинат Прилеп како сребрени партнери на настанот.