Според новите неофицијални информации, претстојниот iOS 18 ќе биде инспириран од visionOS, оперативниот систем на кој работи Apple Vision Pro, кој неодамна имавме можност да го испробаме.
Apple ќе го претстави iOS 18 на првиот ден од својата WWDC годишна конференција за програмери, на 10 јуни. Според реномирани аналитичари, тоа би требало да биде „најамбициозната ревизија на софтверот за iPhone во неговата историја“, а сето тоа благодарение на интеграцијата на вештачката интелигенција во апликациите како Siri, Pages и Keynotes.
Иако може само да се нагаѓа вистинскиот дизајн на iOS 18, порталот MacRumors од наводно сигурен извор добил концепт кој покажува како ќе изгледа новата верзија на мобилниот оперативен систем на Apple.
Според овие информации, јасно е дека iOS 18 ќе црпи голема инспирација од visionOS, оперативен систем на кој работи Apple Vision Pro.
За оние кои не знаат, visionOS содржи речиси целосно транспарентни прозорци со рефлектирачки рабови. Како Apple ќе го имплементира таквиот дизајн во iOS 18, засега е непознато, но MacRumors наведува дека слично ќе изгледа и новиот iPadOS 18.
Во секој случај, повеќе информации ќе бидат познати во наредните недели.
