Бидејќи Galaxy Watch Ultra го претставува самиот врв на палетата на паметни часовници на Samsung, тоа ќе се одрази на цената која би требало да изнесува дури 699 евра.
Samsung следната среда ќе ја претстави новата серија паметни часовници, Galaxy Watch 7, кој за прв пат ќе го вклучи и Galaxy Watch Ultra, најнапредниот часовник на компанијата досега, кој би требало да му конкурира на Apple Watch Ultra.
Неодамна ги објавивме спецификациите на новите паметни часовници на Samsung, а сега се појавија и неофицијални информации за цените. Galaxy Watch Ultra ќе пристигне на пазарот со препорачана малопродажна цена од 699 евра и ќе биде достапен во три бои – Titanium Grey, Titanium Silver и Titanium White.
Од друга страна, 40-милиметарскиот Galaxy Watch 7 ќе чини 319 евра, додека поголемата верзија од 44 милиметри ќе чини 349 евра. Доколку ги сакате верзиите на овие часовници со можност за 4G LTE поврзување, тоа ќе ве чини точно 50 евра повеќе, пишува GSM Arena.
За потсетување, Galaxy Watch 7 ќе го покренува 3 нанометарски чипсет и ќе има куќиште направено од материјал кој Samsung го нарекува Armor Aluminium 2, а меѓу другите карактеристики на издржливост, Watch 7 ќе има и водоотпорност од 5 ATM, како и IP68 стандарди и MIL- STD-810H. Помалата верзија ќе има 1,3-инчен, а поголемиот Super AMOLED екран од 1,5 инчи.
Galaxy Watch Ultra ќе пристигне со титаниумско куќиште кое може да се пофали со малку подобра водоотпорност од 10 ATM, но ги дели IP68 и MIL-STD-810H сертификатите со поевтините модели. Покрај тоа, ќе го користи истиот чипсет од 3 нанометри и ќе има 32 GB простор за складирање.
