Следната генерација на флегшип паметни телефони од Galaxy S25 серијата на Samsung се очекува да дебитира на почетокот на следната година. Секако, веќе има голем број гласини за уредите, а неодамна се појави и една која навести дека компанијата нема да го лансира Galaxy S25+.
Сепак, сега се појавија нови податоци кои се чини дека го побиваат тоа. Според првичните информации, во базата на податоци на IMEI се забележани само два модели од Galaxy S25 серијата, и тоа Galaxy S25 и Galaxy S25 Ultra.
Во меѓувреме, Galaxy S25+ е сепак забележан во базата на податоци на GSMA, што потврдува дека сè уште е планирано да се појави следната година. На тој начин, Samsung изгледа повторно верува во стратегијата со три флегшип модели.
Друга гласина што вреди да се напомене е дека Samsung планира да го користи Snapdragon 8 Gen 4 чипсетот во сите три модели во сите региони. Покрај тоа, Galaxy S25 Ultra би можел да има позаоблени рабови и да биде најтенкиот Ultra модел досега.
