Ако избришете нотификација на вашиот таблет, истото известување сè уште останува на вашиот мобилен телефон. Поради оваа причина, можноста за синхронизирање на известувањата би била корисна за многумина
Google развива начин за синхронизирање на нотификациите помеѓу уредите во својот екосистем. Репортерот на порталот Android Authority, Мишал Рахман откри референца за новата опција „sync across devices“ во бета кодот на Android 15.
Оваа опција се наоѓа во делот за поставки за известувањата и е сместена помеѓу опцијата „sensitive notifications“ и сосема новата опција „notification cooldown“. Во моментов, нема функција за синхронизација на известувањата на Android, што значи дека ако избришете известување на таблетот, истото известување сè уште останува на вашиот смартфон.
Рахман забележува и дека ова парче код се наоѓа под контролерот на Android, што сугерира дека оваа функција навистина може да биде достапна на сите уреди со Android, а не само на Pixel телефоните на Google.
Сепак, без официјална потврда, сè уште ништо не е сигурно, но во секој случај е добро да се знае дека Google работи на оваа опција, која би можеле да ја користат оние со повеќе уреди.