Со само 1,2 килограми, LG Gram го оправдува своето име, посебно што станува збор за 16-инчен лаптоп. Покрај тоа, доаѓа со квалитетен IPS екран кој покрива 99% од DCI-P3 спектарот, а може да се очекува и повеќе од 12 часа траење на батеријата
LG Gram е лаптоп чиј приоритет е малата тежина, а кога ќе се придодаде поголемата дијагонала на екранот , како во случајот со моделот од 16 инчи, навистина се добива ултрапереносен лаптоп. Некои од другите предности се Intel Ultra 5 и 7 процесорите со кои доаѓа, квалитетниот екран и премиум материјалите од кои е направен. Како и останатите производители, LG го засити пазарот со различни изведби на Gram моделите, па кај нас можат да се најдат уреди од претходни генерации и Pro модели. Ова е LG Gram 16 со кодна ознака 16Z90S-G.AA78A9.
Како што се очекува од ултрапереносен лаптоп, LG Gram има метална изработка од алуминиумска и магнезиумска легура. Достапни се три бои: Snow White, Charcoal Gray и Obsidian Black. Преовладува минимализам кој го прекинува само името „gram“ на капакот на екранот и речиси ништо на делот за дланките. Лаптопот се истакнува со тенок профил од 15,7 mm и тежина од само 1,12 килограми, што е одлична вредност за лаптоп со дијагонала од 16 инчи. LG ставил многу тенки рамки околу екранот.
Екранот е IPS резолуција од 2560 x 1600 пиксели. Има 16 инчи и сооднос 16:10, покрива 99% од DCI-P3 спектарот и може да се користи од креативни професионалци за полесни задачи во рамките на можностите на компонентите во куќиштето. Екранот има осветленост од 350 cd/m² и е еден од најсилните адути на овој лаптоп.
Во внатрешноста на тенкото куќиштето се сместени Intel Ultra процесори. Овој конкретен модел е опремен со Core Ultra 7 155H процесор со 16 јадра, од кои шест се за перформанси. За графиката се грижи интегрираната Intel Arc графичка картичка, а лаптопот има 16 GB RAM (можно е најмногу 32 GB) и SSD со капацитет од 1 TB. Вкупно, овие компоненти овозможуваат непречена работа со канцелариски апликации, уживање во мултимедија, а исто така и понекоја потешка задача или полесни игри на пониски поставки.
Лаптопот има тастатура со нумерички дел и издвоени копчиња за насоки, а копчињата имаат длабочина од 1,6 mm и бело позадинско осветлување. Подолу се наоѓа голем touchpad, направен како една целина без видливи физички копчиња. LG Gram 16 доаѓа со стерео звучници (2 x 2 W) и поддржува Dolby Atmos. Од интерфејсите, тука се HDMI, два USB-C порта со поддршка за DisplayPort и Thunderbolt 4. Има и два стандарни USB-A порта, 3,5 mm аудио приклучок и читач за microSD картички. Цената на овој модел изнесува е 1590 евра, а станува збор за интересен модел со многу способни компоненти, квалитетен екран и изработка што е потврдена со воен сертификат. Се истакнува со малата тежина за лаптоп со толку голема дијагонала.