Samsung наводно работи на „Slim“ верзија на својот претстоен флегшип модел Galaxy S25 за да им конкурира на плановите на Apple поврзани со тенкиот телефон iPhone 17 Air.
Apple следната година планира да воведе ултра-тенок модел „Slim“ или „Air“ во iPhone 17 линијата. Според извештаите, овој уред ќе има екран од 6.55 инчи, само една камера и ќе биде изработен од алуминиум наместо титаниум. Сè уште нема точни информации за дебелината на „Slim“ моделот, но изгледа дека и Samsung сака да се приклучи на оваа трка.
Извештајот на ETNews открива дека Samsung планира да го лансира Galaxy S25 Slim смартфонот по иницијалното лансирање на Galaxy S25 серијата следната година. Уредот би се појавил во „ограничени количини“ и би можел да биде лансиран во април, според наводите на @Jukanlosreve. Сè уште не е јасно на кој начин Slim уредот ќе се разликува од остатокот на серијата, освен што ќе биде потенок.
Доколку овој Slim модел биде добро прифатен од корисниците, Samsung планира да го интегрира овој нов дизајн во серијата Galaxy S26.
Се очекува дека кај Apple, Slim моделот ќе ја замени верзијата iPhone 17 Plus, додека за Samsung сè уште не е јасно каде би се вклопил овој модел. Galaxy S24+ годинава беше уред со најбрзорастечка продажба во S24 линијата, така што замената на овој модел со потенок телефон не доаѓа предвид.
