Претставувањето на ова возило се очекува во текот на 2026 година, кога ќе бидат објавени повеќе информации за него.
Bentley направи прв чекор кон електрификација кон крајот на минатата деценија, кога го претстави својот прв хибриден автомобил. По Bentayga Hybrid, компанијата претстави и хибридни верзии на моделите Continental GT и Flying Spur, а сега дознавме нешто повеќе информации за нивниот прв целосно електричен автомобил. Овој автомобил компанијата планира да го претстави во 2026 година и треба да биде „луксузен урбански SUV“.
Овој автомобил, според ретките информации што ги споделија од Bentley, ќе ја споделува истата платформа како и идниот Porsche Cayenne EV и ќе биде помал од моделот Bentayga, па се очекува да влегува во категоријата на Audi Q8 e-tron и Mercedes EQE SUV. Што се однесува до перформансите, од Bentley сè уште не зборуваат за конкретни бројки, но нагласуваат дека автономијата и брзината на полнење ќе бидат главни приоритети на ова возило. Заедно со цената, автономијата и полнењето се означени како најголеми проблеми за електричните автомобили. Како што е јасно, купувачите на Bentley веројатно нема да се премислуваат премногу околу цената, па компанијата ќе се фокусира на исполнување на нивните барања за достапна автономија со едно полнење на батеријата, додека самата батерија ќе треба да се полни побрзо. Колку брзо, тоа ќе дознаеме во наредните две години.
Преминот на Bentley на електрични возила е уште еден доказ за тоа како традиционалните производители на автомобили се прилагодуваат на трендовите, а нивниот прв електричен автомобил треба да привлече нова генерација купувачи. Што се однесува до старата школа, односно традиционалните купувачи на луксузни модели од овој бренд, за нив електричноста – не е приоритет.
Како што објасни извршниот директор на компанијата, Frank-Steffen Walliser, моментно нема голема побарувачка за електрични автомобили од нивните традиционални купувачи. Во текот на следната деценија оваа ситуација сепак треба да се промени, па по 2035 година (што е подоцна од претходно најавеното), Bentley би можел да има во понуда само автомобили со електрични мотори, а до тогаш се очекуваат повеќе нови хибридни и целосно електрични модели.
