Новата верзија на Chrome за iOS донесува повеќе нови функции преземени од Android верзијата, вклучувајќи истовремено пребарување на слики и текст преку Google Lens.
Chrome за iOS веќе овозможуваше користење на Google Lens за пребарување на слики на iPhone или слики снименени со камерата, но сега е можно да се додаде и текст за попрецизно пребарување во само еден чекор.
На пример, корисниците можат да прикачат фотографија од маица која им се допаѓа, да напишат посакувана боја и пребарувачот ќе се обиде да го пронајде соодветниот модел. Интересно е што оваа надградба доаѓа во време кога Apple ја претстави својата функција за пребарување преку Apple Intelligence, која е достапна на iPhone 16 и 16 Pro.
Како што пренесува The Verge, новата верзија на Chrome за iOS исто така овозможува директно зачувување на слики и датотеки, како PDF документи, во Google Photos и Google Drive. Ова е корисно за оние кои веќе ја исполниле бесплатната 5 GB iCloud меморија или оние кои преферираат да го користат Google Drive за складирање.
Покрај тоа, Chrome за iOS воведува и „Shopping Insights“ – функција која прикажува известување за добра понуда на производи што корисникот ги пребарува, поддржано со следење на цените. За користење на оваа функција, потребно е синхронизирање на историјата на прелистување со Google и овозможување на опцијата „Make searches & browsing better“.
Една од новите функционалности е и мини-прегледник за Google Maps. Кога ќе се допре адреса на некоја веб-страница, корисниците можат да ја видат локацијата на Maps без отворање на нова картичка или префрлување на апликацијата.