Компанијата OpenAI во февруари најави дека нејзиниот ChatGPT добива можност за паметење, што му овозможува да се „сети“ на претходните разговори со корисникот, а сега Google воведе нешто слично за Gemini.
Корисниците сега можат да побараат од Gemini да ги запамети нивните интереси и преференции, што ќе му помогне на четботот да понуди „уште покорисни и порелевантни одговори приспособени на потребите на корисникот“, соопштија од Google.
Сега корисниците можат да споделуваат работи кои сакаат Gemini да ги запамети, било преку природен разговор или преку специјализираната страница Saved Info, каде што секогаш може да се прегледа, уредува и отстранува сè што е споделено со Gemini. Исто така, Gemini ќе го извести корисникот секогаш кога ќе ги користи неговите зачувани податоци.
Оваа можност моментално е достапна на англиски јазик во Gemini Advanced како дел од Google One AI Premium планот. Доколку корисникот одлучи да ја користи оваа функција, Google ветува дека ќе добие „поконзистентни и попредвидливи резултати без повторување на истите одговори“.