Ултракопактните 1.13 мм тенки микрозвучници Sycamore, од компанијата xMEMS обезбедуваат звук со полн опсег без потреба од затворено куќиште.
xMEMS, компанијата што го создаде првиот звучник базиран на процесот за производство на микрочипови, се подготвува да ја пушти во продажба својата следна серија мали звучници. Микрозвучниците познати како Sycamore се најновиот модел, со дебелина од само 1,13 мм и тежина од само 150 милиграми. Тие се способни да репродуцираат звук со полн опсег на кратки растојанија, како на пример растојанието помеѓу вашите уши и рачките на вашите паметни очила.
Sycamore претставува најнов чекор во еволуцијата на микрозвучниците. Првата верзија на xMEMS микрозвучниците се користеше во безжични слушалки за репродукција на високи фреквенции, но беше потребна помош од динамички драјвер за басот. Нивниот втор производ можеше да репродуцира звук со полн опсег, но беше ограничен на слушалки што го затвораат ушниот канал со силиконски врв. Sycamore е првиот микрозвучник на компанијата што репродуцира звук со полн опсег без потреба од затворено, запечатено опкружување.
Компанијата истакнува бројни аудио предности на Sycamore драјверот во споредба со традиционалните технологии на звучници: „Со пад на ниските фреквенции од 6 dB/октава, може да се спореди со перформансите на средниот бас кај постарите драјвери, додека нуди дури 11 децибели поголем опсег во суббас екстензијата. Sycamore микрозвучниците исто така ги поместуваат границите на перформансите на високите фреквенции—дури 15 dB над 5 kHz во споредба со постарите драјвери.“
Со други зборови, се очекува Sycamore да обезбеди подобри ниски и високи тонови. Тој е исто така исклучително издржлив, со рејтинг IP58, што го прави отпорен на вода и многу отпорен на прашина.
Сепак, токму неговата големина се очекува да ги инспирира дизајнерите на електроника да креираат подобри производи. Според xMEMS, Sycamore е седмина од големината на конвенционалниот пакет динамички драјвер и една третина од неговата дебелина. Оваа разлика би можела да резултира со паметни очила со потенки и модерни рачки, потенки и поиздржливи паметни часовници, како и слушалки што се помали, но нудат подобар звук.
xMEMS исто така предвидува дека Sycamore ќе најде и други примени. Со своите перформанси на високите фреквенции, може да служи како високотонец во потпирачи за глава во автомобили, Bluetooth звучници и лаптопи. Компанијата смета дека ќе овозможи појасни повици и поголема приватност кога се користи како звучник за уво во паметни телефони.
Сепак, сè уште е рано за прогнози, бидејќи xMEMS нема да ги пушти производствените примероци на Sycamore за потенцијалните компании за електроника пред првиот квартал на 2025 година. Компанијата тврди дека масовното производство нема да започне пред октомври 2025 година. И покрај тоа, со вакви временски рамки, првите производи со Sycamore би можеле да бидат најавени навреме за CES 2026, пренесува DigitalTrends.
