Оваа функција им овозможува на корисниците на Android да пренесат податоци од друг уред во било кое време, дури и по иницијалното подесување.
Google објави дека револуционерната Android функција, моментно достапна само на Pixel 9 уредите, ќе биде воведена и на другите смартфони со нивниот оперативен систем во 2025 година. Оваа функција им овозможува на корисниците да пренесат податоци од друг уред во било кое време, дури и по иницијалното подесување, што го прави преминот на нов телефон поедноставен од кога било.
Моментно ексклузивна за Pixel 9, оваа функција ја елиминира потребата за пренос на податоци за време на првото подесување. Корисниците можат веднаш да го истражуваат својот нов телефон, а преносот на податоци да го извршат подоцна. Процесот лесно се активира преку опцијата Подесувања или преку ажурираната апликација Android Switch, која е достапна на Play Store.
Android Switch донесува унапредувања
Подобрената апликација Android Switch воведува поедноставен процес за подесување. Една од новитетите е експресното подесување за премин од стар уред, кое пренесува само податоци зачувани на телефонот, додека ги прескокнува оние што веќе се синхронизирани со облакот, заштедувајќи време и избегнувајќи дуплирање на податоци.
Google ветува јасни чекори за време на подесувањето, овозможувајќи непречен пренос на сè – од пораки и контакти до Wi-Fi поставки и Google сметки. За корисниците кои преминуваат од iPhone, подобрениот пренос на податоци преку кабел сега е 40% побрз во споредба со 2023 година. Ова значително заштедува време за корисници со големи количини податоци, поедноставувајќи го инаку долготрајниот процес.
Со овие промени, Google го прави преминот на Android подостапен и поедноставен, обезбедувајќи подобро искуство како за надградби, така и за промена на платформите, пишува Google Blog.