Google наводно го прекина развојот на Pixel Tablet 2 поради загриженост дека тоа би можело да предизвика финансиски загуби.
Во мај минатата година, Google го претстави Pixel таблетот, уред со екран од 10,95 инчи, Tensor G2 процесор, 8 GB RAM и до 256 GB внатрешна меморија, без можност за проширување со microSD картичка. Иако таблетот не ја постигна популарноста на која Google се надеваше, главно поради високата цена и послабите спецификации во споредба со конкуренцијата, веќе неколку месеци се зборуваше за негов наследник.
Сепак, според Android Authority, Pixel Tablet 2 нема да биде објавен. Развојот е прекинат бидејќи Google смета дека уредот би можел да донесе финансиски загуби. Според неофицијални информации, таблетот требаше да користи Tensor G4 процесор и да биде достапен во Wi-Fi и LTE верзии, а неговото претставување беше планирано за 2025 година.
Оваа вест јасно покажува дека Google повторно не е посветен на пазарот на таблети. Компанијата продолжува да избегнува интеграција на корисни функции специфични за таблети во Android, што му овозможува на Apple речиси целосно да доминира на овој пазар.
За да се обиде да „земе дел од колачот“ од Apple, неодамна се дозна дека Google работи на проект за спојување на своите оперативни системи Android и ChromeOS. Ова наводно би му овозможило на Android да добие корисни функции за таблети, кои Apple одамна ги има интегрирано во својот iPadOS, оперативен систем базиран на iOS.