Google пребарувањето добива AI режим што воведува големи промени во начинот на кој ќе ги пребарувате поимите на интернет.
Според извештаите, Google Search планира да воведе нов „AI Mode“ во својот пребарувач, овозможувајќи им на корисниците да пребаруваат користејќи интерфејс сличен на Gemini AI chatbot. Оваа опција ќе биде поставена на врвот на страницата со резултати од пребарувањето, нудејќи дополнителни можности потпомогнати од вештачка интелигенција.
Како што пренесува The Information, AI Mode ќе биде сместен во посебен дел лево од постојните опции како што се „All“, „Images“, „Video“ итн. Кога корисниците ќе добијат одговори генерирани од АИ, ќе им бидат прикажани линкови кон контекстуални страници, како и дополнително поле за пребарување со сугестии за поставување понатамошни прашања.
Покрај тоа, програмски код откриен во бета-верзијата на апликацијата Google, на кој укажува Android Authority, сугерира дека AI Mode ќе поддржува поставување прашања со глас. Ова би им овозможило на корисниците да добиваат одговори потпомогнати од АИ технологија на уште поинтуитивен начин.
Имајќи предвид дека OpenAI веќе нуди сличен начин на пребарување во ChatGPT за сите корисници, Google се соочува со сè поголем притисок да ја интегрира вештачката интелигенција во своите основни функции за пребарување. Google веќе има имплементирано АИ резимеа во пребарувањата за одредени упити и ја прошири таа функција во многу земји од октомври.
Воведувањето на АИ режимот може значително да го промени начинот на кој корисниците го користат Google пребарувањето, нудејќи побогати информации и можност за интерактивно истражување. Датумот за официјално лансирање сè уште не е познат, но оваа функционалност укажува на сè поголемиот фокус на Google за конкурирање во областа на вештачката интелигенција.
