Станува збор за уште една апликација за Android паметните телефони која е специјализирана за управување со фајлови. Таа нуди функционалности кои би се очекувале од апликации од овој тип, но воведува и поддршка за табови, што на некои корисници сигурно ќе им се допадне…
Меѓу управувачите со датотеки на паметните телефони постои жестока конкуренција, особено затоа што постојат добро познати и богато опремени алатки, како и основни кои обично доаѓаат заедно со самиот телефон. Computer File Explorer спаѓа некаде во средината, но сепак нуди неколку интересни можности.
Она што ја издвојува уште на прв поглед е поддршката за табови кои се поставени на дното од екранот. Благодарение на нив, корисниците лесно можат да се префрлуваат меѓу различни папки во внатрешната меморија на телефонот, како и фолдерите кои се достапни преку локалната мрежа или преку FTP и SFTP.
Апликацијата нуди сите типични функционалности кои би се очекувале од ваков тип на алатка, но има и некои дополнителни детали, како вградена поддршка за Zip архиви, управување со апликациите на телефонот, вграден мултимедијален прегледник кој овозможува репродукција на различни медиумски формати и други корисни функции.
Севкупно, иако Computer File Explorer можеби не е толку богато опремен како некои од познатите управувачи со датотеки за Android, тој сосема коректно ја извршува својата задача кога станува збор за манипулација со датотеки. Самата апликација е бесплатна, но прикажува реклами за кои авторот се труди да бидат што помалку наметливи.