Nokia паметните телефони се целосно отстранети од официјалната веб-страница на HMD Global, и остануваат само класичните модели
Некогаш доминантниот бренд кој го одбележа пазарот на мобилни телефони и беше тивка желба на многу корисници на мобилни гаџети, Nokia повторно се повлекува од пазарот на паметни телефони. Компанијата HMD Global, која ја поседува лиценцата за производство на уреди Нокиа, ги отстрани сите Нокиа паметни телефони и таблети од својата официјална веб-страница, оставајќи во продажба само три класични модели: Nokia 215 4G (2024), Nokia 2660 Flip и Nokia 5710 XA.
Крај на една ера за паметните телефони Nokia
HMD Global веќе минатата година престана со лансирање на нови Нокиа паметни телефони, пренасочувајќи се кон развој на уреди под сопствен бренд. Ова го означи повлекувањето на Нокиа од конкурентската трка на пазарот на паметни телефони. Иако Нокиа паметните телефони сега се целосно повлечени од продажба, се очекува класичните модели да продолжат да се продаваат до истекот на лиценцата помеѓу HMD Global и Нокиа, која важи до 2026 година.
Nokia 9 PureView – последната голема иновација
Еден од најдобрите модели од серијата паметни телефони на Нокиа без сомнение беше Nokia 9 PureView, лансиран во 2019 година. Овој уред смело воведе дизајн со пет камери, што го направи уникатен на пазарот, но не постигна значаен комерцијален успех.
Самата компанија Nokia повеќе не се занимава со производство и развој на мобилни телефони. Нивниот фокус сега е насочен кон области како што се телекомуникациска инфраструктура, софтверски услуги и изградба на комуникациски мрежи.
По истекот на договорот со HMD Global, останува неизвесно дали ќе се појават други производители заинтересирани за купување на лиценцата и продолжување на производството на уреди Нокиа. До тогаш, класичните Нокиа телефони остануваат единственото што потсетува на некогашниот лидер на мобилниот пазар, пишува LTN.
