Откако претходно оваа недела Asus го претстави подостапниот гејмерски смартфон ROG Phone 9 FE, сега е ред на ново дополнување во линијата Zenfone. Станува збор за Asus Zenfone 12 Ultra, кој доаѓа со LTPO OLED панел Samsung E6 со дијагонала од 6,78 инчи, динамична стапка на освежување од 1 до 120 херци и опција за 144 херци во одредени поддржани игри.
Меѓу останатите карактеристики на панелот се максимална осветленост од 2500 нита, 107,37% покриеност на DCI-P3 спектарот на бои и заштитно стакло Gorilla Glass Victus 2. Исто така, има отвор во екранот за 32MP селфи камера.
Уредот е опремен со Snapdragon 8 Elite чипсет , комбиниран со до 16GB LPDDR5X RAM и до 512GB UFS 4.0 меморија за податоци. Батеријата има капацитет од 5500 mAh и поддржува брзо жично полнење до 65W и безжично полнење до 15W.
На софтверски план, Zenfone 12 Ultra работи на Android 15 со повеќе функции засновани на вештачка интелигенција. Уредот вклучува голем јазичен модел Llama 3 8B од Meta, кој работи локално. Покрај тоа, достапни се AI Call Translator 2.0, AI Transcript 2.0, AI Object Sense, AI HyperClarity, AI Document Summary и други.
Главната камера користи 50MP сензор Sony Lytia-700 со 6-осен гимбал стабилизатор, 32MP телефото леќа со 3x оптички зум и OIS, како и 13MP ултраширокоаголен објектив. Останатите карактеристики вклучуваат 3,5 мм аудио приклучок, eSIM, IP68 сертификат за водоотпорност и 100% рециклиран алуминиум за рамката.
Asus Zenfone 12 Ultra чини 1100 евра, но до 28 февруари ќе биде достапен по промотивна цена од 1000 евра.
