Нова AI технологија може радикално да го унапреди дизајнот на чипови, но отвора и прашања за поправки и одржување
Компјутерските чипови се основа на современиот свет, присутни во сè – од паметни телефони и компјутери до автомобили и медицински уреди. За да ја зголемат ефикасноста и да го забрзаат иновативниот процес, научниците сè почесто користат вештачка интелигенција за дизајнирање побрзи и поефикасни чипови, наместо целосно да се потпираат на експертизата на инженерите.
AI го презема дизајнот на чипови – и ги менува правилата на игра
Тим истражувачи од Универзитетот Принстон, предводен од електроинженерот Каушик Сенгупта, разви метод со кој вештачката интелигенција дизајнира и тестира нови типови чипови. Нивната работа е објавена во списанието Nature Communications, а целта не е да ја замени човечката експертиза, туку дополнително да ја унапреди.
За разлика од традиционалниот пристап, каде што инженерите рачно ја креираат структурата на чипот, овој метод користи инверзен дизајн. Наместо да започнат од веќе познати шеми, истражувачите прво ги дефинираат посакуваните перформанси, а потоа АИ алгоритмот самостојно ја формира архитектурата на чипот.
Како AI размислува поинаку од луѓето?
Вештачката интелигенција нема исти когнитивни ограничувања како човечкиот мозок, што ѝ овозможува да создаде структури што инженерите не би можеле ниту да ги замислат. Користејќи конволутивни невронски мрежи (CNNs), АИ генерира дизајни и шеми кои на прв поглед изгледаат хаотично и неуредно, но нудат подобра ефикасност и перформанси.
„Класичните дизајни внимателно ги распоредуваат електричните и електромагнетните компоненти една по една за сигналот да тече во посакуваната насока. АИ ги менува овие структури на начини кои претходно не можевме да ги постигнеме,“ изјави Сенгупта за Универзитетот Принстон.
Проблем на повидок: ако луѓето не ги разбираат чиповите, како ќе ги поправат?
Иако АИ овозможува револуционерен дизајн, постојат сериозни ограничувања. Најголемиот предизвик е што инженерите не можат целосно да разберат како функционираат чиповите генерирани од АИ. Ако не можат да ги поправат или унапредат, тие може да станат еднократни или невозможни за поправка.
Традиционалните инженери поминуваат години учејќи и усовршувајќи го дизајнот на чипови, додека АИ може да создаде непознати и неконвенционални структури за само неколку минути. Ова отвора прашања за одржливоста и долгорочната доверливост на овие чипови, пишува Popular Mechanics.
AI може да донесе револуција во индустријата за чипови, но воведувањето на алгоритми што луѓето не можат целосно да ги разберат носи одредени ризици. Додека вештачката интелигенција отвора нови можности за дизајн и перформанси, клучното прашање останува – дали човештвото ќе може да контролира и одржува сè што АИ ќе создаде?
