DeepSeek е најновиот хит во светот на АИ технологијата, а компании како Huawei, Honor и Microsoft, како и некои производители на автомобили, веќе го користат моделот R1 за своите производи и услуги. Сепак, би можеле да се појават проблеми.
DeepSeek R1 е кинеска платформа која брзо стекна голема популарност во САД и речиси преку ноќ ја зазеде првата позиција во онлајн продавницата за апликации на Apple – App Store.
Сепак, извршниот директор на ARM, Рене Хаас, е загрижен за иднината на оваа услуга. Во изјава за Financial Times, тој рече дека апликацијата би можела да биде забранета во САД поради геополитички импликации, бидејќи потекнува од кинеска компанија.
Хаас посочи дека неговата прогноза го одразува развојот на настаните во последните неколку недели во врска со социјалната мрежа TikTok, која е во сопственост на ByteDance и има кинеско потекло. TikTok се соочува со можност за разделување на своите операции во САД или потенцијално целосно гасење, и покрај одложувањата на забраната.
DeepSeek нема американски операции и користи open-source модел на вештачка интелигенција DeepSeek R1 за својата апликација и веб-услуга. Како резултат на тоа, иако пристапот до сервисот може да биде ограничен, корисниците сè уште можат да го преземат и користат јазичниот модел на своите уреди.
