Apple работи на 27-инчен Mini LED дисплеј, кој би можел да биде достапен веќе кон крајот на 2025 година, објави аналитичарот за дисплеи Рос Јанг. Овој монитор би можел да биде нова верзија на Studio Display, кој Apple првпат го претстави во 2022 година. Актуелната верзија на Studio Display користи 5K LED панел, па mini-LED верзијата би била значајна надградба.
Јанг наведува дека дисплејот ќе користи mini-LED диоди од Epistar, додека LG Display ќе ги испорачува панелите.
Во 2023 година, Јанг тврдеше дека Apple работел на Studio Display Pro со ProMotion технологија, но наводно проектот бил откажан. Тогаш Јанг изјави дека Apple не работи на друг 27-инчен дисплеј, но аналитичарот Минг-Чи Куо остана на ставот дека компанијата планира да лансира некаква верзија на дисплеј во 2025 година.
Apple веќе користи Mini LED технологија за MacBook Pro. Во споредба со LED, Mini LED дисплеите нудат поголема осветленост, подобар контраст и попрецизна репродукција на бои. На пример, дисплејот на MacBook Pro користи повеќе од 10.000 mini-LED диоди за подлабоки црни тонови, повеќе детали во сенките и подобрени светли делови.
Марк Гурман од Bloomberg ја потврди гласината дека Apple работи на 27-инчен Mini LED дисплеј и верува дека ќе биде достапен во 2026 година.
