Истражувањето открива дека дури четвртина од луѓето признаваат дека флертувале со четбот. Овој тренд отвора прашање: што значи да се биде во врска во 21 век, кога границата меѓу реалниот и виртуелниот свет станува сè понејасна?
Компанијата World, предводена од тимот на Сем Алтман, објави изненадувачки резултати кои фрлаат ново светло врз иднината на човечките односи. Според ова истражување, четвртина од испитаниците признале дека флертувале со вештачка интелигенција, свесно или несвесно. Овој тренд предизвикува дилема: што всушност претставува љубовната врска во денешниот дигитален свет?
Растечки емоционални врски со AI
Истражувањето опфатило 90.000 корисници во рамките на глобалната мрежа World, која брои повеќе од 25 милиони луѓе, откривајќи дека многумина веќе започнале да развиваат емоционални врски со вештачка интелигенција.
Еден од пионерите на овој феномен е апликацијата Replika, лансирана во 2017 година.
Апликацијата им овозможува на корисниците да создадат персонализирани романтични четботи, а до 2023 година привлекла 676.000 активни дневни корисници, кои во просек поминуваат два часа дневно во разговори со своите виртуелни партнери.
Осаменост во дигиталниот свет
Иако интересот за AI романтиката расте, корисниците сè уште остануваат претпазливи. Повеќе од 90% од испитаниците изјавиле дека би сакале апликациите за запознавање да воведат верификација на вистински луѓе, додека 60% се посомневале дека комуницираат со бот, наместо со вистинска личност.
Овој феномен поставува сериозни прашања за довербата и безбедноста во дигиталните односи, додека сè повеќе луѓе бараат емоционални врски во виртуелниот свет.
AI во светот на запознавањето
Тијаго Сада, главен производствен директор во компанијата Tools for Humanity, која ја развива технологијата на World, ги сподели своите впечатоци:
„Како некој што редовно користи апликации за запознавање, постојано се соочувам со лажни профили. Понекогаш забележувам дека некои профили се предобри за да бидат вистинити, или се среќавам со чудни детали – како на пример, некој да има шест прсти. Зошто? Затоа што тоа е дело на AI.
Како да се подготвиме за иднината?
Со сите овие нови предизвици, се поставува прашањето: дали емоционалното врзување со AI е само чекор кон иднината или потенцијална закана за вистинските човечки интеракции?
Додека некои гледаат на “AI” како начин за надминување на осаменоста, други предупредуваат на сериозните психолошки последици од ваквите односи, кои се темелат на технологија, а не на вистински човечки контакт.
За да се справи со овој проблем, World разви World ID Deep Face, иновативен систем за верификација кој користи напредна технологија за потврда на идентитетот.
Овој систем, кој го скенира окото на корисниците преку специјален уред, овозможува потврда дали лицето навистина комуницира со вистинска личност во реално време – било да е тоа преку видеоповици или четови на платформи како Google Meet, Zoom и апликации за запознавање.
Во иднина, дигиталните врски и односите со AI најверојатно ќе станат неизбежна реалност. Додека технологијата се развива, останува да видиме како ќе се обликува нашиот емоционален свет во ерата во која ботовите стануваат нашите „најблиски партнери“.
