Премиум моделот на Hisense нуди можности како напредно локално затемнување, Mini LED и Quantum Dot технологија, 144 Hz и напреден Hi-View Engine X процесор. Со широка поддршка за HDR, U9N има и напреден аудио систем и квалитетна изработка.
Hisense претстави голем број модели на нашиот пазар, а ние детално го тестиравме U8NQ, кој е малку послаб од врвниот модел. Најголемите разлики се во напредното управување со позадинското осветлување, уште поквалитетната изработка на U9N моделот и фактот дека овој модел доаѓа само во големи димензии од 75 и 85 инчи, како дел од врвната Mini LED понуда. Широката HDR поддршка, 144 Hz и напредниот процесор со AI алгоритми за управување и прилагодување на сликата се уште некои од адутите на оваа серија. Hisense U9N сè уште не пристигнал на домашниот пазар, а на Amazon цената за 75-инчниот модел изнесува 1899 долари.
Hisense U9N пристигнува во две големини, што значи дека станува збор за навистина големи телевизори. Од предната страна, сите четири рабови имаат ултратенка метална рамка, а уредот се потпира на две тенки ногарки кои се поставуваат на краевите на телевизорот. Нема дополнителни прилагодувања по висина ниту можност за поставување на ногарките во потесна конфигурација за помали ТВ маси. Дебелината на моделот е рамномерна и изнесува 4,8 см на најдебелиот дел. На задната страна, покрај сите интерфејси, се наоѓа и субвуфер. Аудио системот има конфигурација 4.1.2 и излезна моќност од 82 W.
Hisense U9N доаѓа со Mini LED позадинско осветлување и дури 5000 зони на локално затемнување, кои овозможуваат многу подобар контраст, подлабока црна боја и намалено појавување на блесоци, како и порамномерен приказ. Како и останатите премиум модели на Hisense, U9N располага со Quantum Dot слој, кој придонесува за поквалитетен приказ на бои. Високиот контраст (иако не на ниво на OLED) и исклучително високата осветленост, која достигнува над 5000 cd/m², создаваат одлични услови за прикажување на HDR содржина. Hisense телевизорот ги поддржува сите HDR стандарди, вклучително и Dolby Vision. Телевизорот е опремен со Hi-View Engine X процесор, кој има сопствен AI алгоритам за длабоко учење, овозможувајќи детекција и анализа на сцените, како и автоматска адаптација според амбиенталното осветлување.
Овој премиум модел е погоден и за гејминг, благодарение на високата стапка на освежување на панелот од 144 Hz, поддршката за Adaptive Sync технологии како FreeSync Premium Pro, како и функциите важни за гејмерите на конзоли, како што се ALLM (автоматски режим со низок латентен одговор) и Dolby Vision Gaming. Ова значи дека автоматски ќе се активира гејминг модот за најниско влезно доцнење, при што играчите на PC ќе добијат 4K/144 Hz, додека оние со конзоли ќе можат да играат на 4K/120 Hz.
Телевизорот нуди и богат сет на конектори. Два HDMI порта се од верзијата 2.1, што овозможува напредни гејминг можности, додека останатите два се HDMI 2.0. Добра вест за корисниците е што еден од HDMI 2.0 конекторите поддржува eARC, така што двата 2.1 порта остануваат достапни за гејминг. Покрај нив, има и два USB порта, дигитален аудио излез, 3,5 мм аудио конектор и Ethernet. Од мрежните опции, поддржани се Bluetooth и Wi-Fi 5E.
На европскиот пазар, Hisense ги опремува своите модели со сопствениот оперативен систем VIDAA, кој има модерен изглед, овозможува лесна навигација и поддржува сите важни стриминг сервиси. Сепак, изборот на апликации не е толку широк како кај некои конкурентни системи.
ВИДЕО РЕЦЕНЗИЈА: Hisense 65U8NQ – Mini LED телевизор што ги надминува можностите на својата класа
