Microsoft ќе ја укине поддршката за Remote Desktop апликацијата наменета за оперативниот систем Windows на 27 мај, а таа ќе биде заменета со апликацијата наречена Windows App.
Корисниците кои ја користат Remote Desktop апликацијата за поврзување со Windows 365, Azure Virtual Desktop или Microsoft Dev Box ќе мора да преминат на Windows App.
Windows App беше лансирана во септември минатата година и нуди поддршка за повеќе монитори, динамички резолуции на екранот и полесен пристап до cloud PC-ја и виртуелни десктопи. Од Microsoft велат дека поврзувањето со Windows 365, Azure Virtual Desktop и Microsoft Dev Box преку Remote Desktop апликацијата од Microsoft Store ќе биде блокирано по 27 мај 2025 година.
Постоечката апликација Remote Desktop не треба да се меша со апликацијата Remote Desktop Connection од Microsoft, која е дел од Windows повеќе од 20 години. Оваа апликација ќе продолжи да постои во Windows 11 и по 27 мај, а од Microsoft нагласуваат дека ќе може да се користи за поврзување со машини сè додека Remote Desktop Protocol (RDP) е поддржан во Windows App.
Споменувањето на RDP поддршката би можело да значи дека Microsoft на крајот ќе овозможи поддршка за лични кориснички налози во Windows App. Во моментов, Windows App може да се користи само ако корисникот има деловна или училишна Microsoft сметка, иако долгорочната амбиција на компанијата е целосно да го префрли Windows во cloud за да „овозможи подобрени AI услуги и целосно дигитално искуство во движење“.
