Откако Epic Games ги отвори вратите, следуваа останатите: Skich, AltStore PAL, Setapp Mobile, Aptoide и Mobivention нудат алтернативи на App Store. Девелоперите добиваат поголем дел од заработката, а корисниците – нови можности. Ова е само почеток
Дистрибуцијата на апликации на iOS платформата претрпе значајни промени благодарение на Законот за дигитални пазари (DMA) на Европската унија, кој стапи на сила по тужбите од Epic Games Store. Apple беше принуден да го отвори својот, досега затворен, екосистем за алтернативни продавници на апликации.
Условите и надоместоците на Apple остануваат пречка
Иако алтернативните продавници сега се дозволени, Apple сè уште поставува строги услови, вклучувајќи безбедносни стандарди и потписи на апликации. Дополнително, Apple им наплаќа на развивачите што користат алтернативни продавници такса наречена „Core Technology Fee“, што предизвика критики како дополнително финансиско оптоварување за оние што се прилагодуваат на новиот екосистем.
Нова ера за iOS и iPadOS во ЕУ
Skich е нова алтернативна продавница за апликации која е исклучиво фокусирана на игри за iPhone и iPad. Платформата нуди на развивачите поголем удел во приходите во споредба со стандардната провизија на Apple од 30%. За корисниците, пак, обезбедува персонализирани препораки за игри со помош на алгоритми засновани на вештачка интелигенција и нуди селектиран избор на квалитетни наслови, наместо хаотична маса апликации.
За да користат Skich, корисниците треба да имаат iOS 17.4 или понова верзија, бидејќи само таа верзија поддржува алтернативни продавници на апликации. Инсталацијата вклучува преземање на продавницата директно од веб-страницата на Skich и нејзино поставување како доверлив извор во iOS поставките.
Други алтернативни продавници
Epic Games Store ја доби битката и отвори врати за другите, овозможувајќи им на корисниците директно преземање на игрите на Epic, враќајќи го Fortnite на iOS уредите без потреба од App Store. Продавницата поддржува купување во апликации преку платежниот систем на Epic, овозможувајќи едноставно корисничко искуство.
AltStore PAL е платформа со отворен код што им овозможува на корисниците да инсталираат апликации надвор од традиционалните ограничувања на App Store. Особено е привлечна за независните развивачи што бараат повеќе флексибилност во дистрибуцијата на своите апликации и овозможува простор за иновативни решенија што можеби не ги исполнуваат строгите критериуми на Apple. Оваа платформа привлече внимание со апликацијата што подигна прашина: „Првата порно апликација стигна на iPhone“.
Setapp Mobile нуди модел базиран на претплата за пристап до колекција од над 50 апликации. Корисниците добиваат автоматско ажурирање и можност за семејно споделување. Оваа услуга од познатата девелоперска компанија MacPaw е ексклузивно достапна за корисниците во ЕУ и бара iOS 17.4 или понова верзија.
Aptoide, кој е многу популарен меѓу корисниците на Android, го прошири своето работење и на iOS платформата во Европската унија. Корисниците сега можат да преземаат апликации надвор од официјалната продавница на Apple и да пристапат до богата колекција на игри и постари верзии на апликации. За разлика од Apple, Aptoide не бара од развивачите да отвораат посебна девелоперска сметка и гарантира дека сите апликации се темелно проверени за безбедност пред да станат достапни за корисниците.
Mobivention App Marketplace е фокусиран на апликации за бизнис-корисници (B2B) и крајни потрошувачи (B2C), нудејќи поедноставени правила за објавување во споредба со App Store. Нивната понуда вклучува и таканаречени „white-label“ решенија, што им овозможуваат на големите компании да лансираат сопствени брендрани продавници за апликации. Mobivention го презема целиот процес на верификација и одобрување на апликациите, осигурувајќи дека тие ги исполнуваат безбедносните стандарди и техничките критериуми на Apple.
