Смартфонот има 6,3-инчен екран со сооднос 16:10 и портрет ориентација, додека на надворешниот панел се наоѓаат три камери и квадратен 3,5-инчен екран.
Huawei го дизајнираше новиот смартфон така што може да се ротира кога се отвора и да се користи како стандарден, меѓутоа, кога е преклопен, неговата шарка стои на страна.
Висината на преклопениот смартфон Pura X изнесува 143,2 mm, а ширината огромни 91,7 mm, што го прави краток, но далеку поширок од кој било смартфон во последно време. Кога е отворен, димензиите се менуваат во 91,7 x 74,3 mm, што е и натаму невообичаено, но веројатно употребливо.
Од двете страни се наоѓаат LTPO OLED панели со фреквенција на освежување од 120 Hz, а преклопниот екран поддржува максимална осветленост од 2.500 нити. Што се однесува до надворешниот екран, можно е да се постават различни позадини, вклучувајќи „live“ опции со приспособливи анимации. Исто така, овозможува користење на камерата, пристап до пораките и апликациите поврзани со здравјето, како и до повиците и музичките плеери без потреба од отворање на смартфонот.
Освен тоа, можно е да се примаат повици додека смартфонот е затворен. Слушалката се наоѓа веднаш покрај LED блицот, што значи дека надворешниот екран е позициониран напред и свртен кон корисникот.
Pura X има три камери подредени во еден ред. Тука е широка камера од 50 MP со отвор на бленда f/1.6, RYYB сензор и оптичка стабилизација на сликата, како и ултраширока 40 MP f/2.2 со уште една камера со RYYB сензор. Телефото камерата од 8 MP со 3,5x оптичко зумирање исто така има оптичка стабилизација, а покрај нив е и спектралниот сензор на слика, кој дебитираше во Mate 70 Pro серијата.
Видео повиците се извршуваат кога Pura X е отворен, а Huawei ја смести камерата од 10 MP во дупчест изрез на главниот екран.
Шарката има класичен дизајн „солза“ и користи издржливи компоненти.
Пласирањето на смартфонот на кинескиот пазар значи дека поддржува сателитско поврзување, но само со кинеските сателити. Исто така, функцијата е ограничена на одредени мемориски конфигурации.
Смартфонот Pura X го напојува батерија со капацитет од 4.720 mAh поделена во две ќелии. Поддржува 66W жично и 40W безжично полнење, а мобилниот доаѓа и со елементи за одведување на топлина, вклучувајќи графитна плоча, која може да обезбеди термална спроводливост од 2.000 W/mK.
Како што е случај во последно време, не е откриено кој процесор го придвижува смартфонот. Од друга страна, познато е дека користи HarmonyOS 5.0, а не HarmonyOS Next.
Преклопниот смартфон доаѓа во стандардна верзија, но и како Collector’s Edition модел кој има два ексклузивни дизајна и е достапен со 16 GB RAM.
Во понудата се три стандардни бои, црна, бела и сребрена, како и Pattern зелена и Pattern црвена Collector’s Edition опција.
Цените се движат од 955 евра за основната 12/256 GB верзија па до 1.020 евра за верзијата со 12/512 GB. Верзијата со конфигурација 16/512 GB чини 1.145 евра, додека за најмоќната верзија со 16 GB RAM и 1 TB интерна меморија е потребно да се издвојат 1.270 евра.
Продажбата во Кина почнува во петок, 21 март, а засега нема информации дали Pura X ќе пристигне на меѓународните пазари.
