Социјалната мрежа Instagram додава нова алатка во својот арсенал мерки против насилството и малтретирањето. Овојпат, Meta директно ги вклучува училишните власти со цел да го забрза својот одговор на безбедносните проблеми што ги засегаат младите тинејџери.
Компанијата Meta го воведува таканаречениот „Програм за партнерство со училишта“ со цел на наставниците и училишните службеници да им понуди нов начин за интервенција кога учениците ќе доживеат малтретирање на Instagram.
Програмата им нуди на училиштата нешто што многу родители одамна го посакуваат – начин за брзо следење на пријавите во апликацијата, кои директно влијаат врз младите ученици. Meta им ветува на училиштата што ќе се приклучат на програмата дека нивните пријави ќе имаат приоритет во редот за модерирање и дека ќе добијат одговор во рок од 48 часа. Училиштата што ќе се пријават, исто така, ќе добијат ознака „school partner“ на своите Instagram профили, како и информации за тоа како да се користат алатките за пријавување и другите ресурси.
Сепак, ова не значи дека Meta вработува нови модератори на содржина кои ќе помогнат со брзото разгледување на пријавите. Портпаролот на Instagram изјави дека пријавите ќе бидат „забрзани“ преку постоечките канали за пријавување и дека училиштата ќе можат да додадат „дополнителен контекст“ на нивните пријави.
Meta веќе го тестираше програмот во соработка со 60 училишта и тврди дека резултатите се „ветувачки“. Сега училиштата во САД можат да се пријават и да се приклучат на листата на чекање за овој нов програм.
Ова не е првиот обид на Instagram да се бори против насилството и малтретирањето. Апликацијата воведе функција за ограничување на коментари во 2021 година, како и построга функција за „рестрикција“ минатата година. Иако овие функции можат да им помогнат на тинејџерите да избегнат одредени типови негативни интеракции, сепак, потребно е тие или нивните родители да ги направат соодветните поставки. Со тоа што им овозможува на училиштата поголема надлежност да пријавуваат конкретни случаи на малтретирање или друго несоодветно однесување, Meta нуди надеж дека училиштата полесно ќе можат да се справат со проблематичното однесување.
