Мистериозни микротунели во пустинскиот мермер и варовник, откриени во пустините на Намибија, Оман и Саудиска Арабија, најверојатно настанале како резултат на дејството на микроби кои живееле пред милиони години.
Иако не е познато дали овој древен облик на живот сè уште постои или одамна исчезнал, неговите траги останале зачувани во карпите.
Геологот Кеес Пашиер од Универзитетот Јоханес Гутенберг во Мајнц забележал мали отвори во карпите за време на истражувањето. Ерозијата ги открила овие фосилни тунели, а иако во нив немало живи организми, понатамошната анализа покажала присуство на биолошки материјал.
„Биотското потекло на овие структури бара присуство на течна вода, без која биолошкиот раст не би бил можен“, наведува истражувачкиот тим во студијата објавена во списанието Geomicrobiology Journal. „Иако овие области денес се суви, повремените дождови и густиот крајбрежен магла укажуваат на тоа дека во минатото постоеле повлажни периоди.“
Прашањето што останува е – кои микроорганизми можеле да ги создадат овие тунели? Познато е дека бактериите, габите и лишаите можат да преживеат во екстремни услови, а некои од нив се ендолити, што значи дека живеат внатре во карпите.
Сепак, истражувачите исклучиле неколку потенцијални кандидати. Цијанобактериите, кои користат сончева светлина за фотосинтеза, не навлегуваат длабоко во карпите, додека габите оставаат карактеристични траги во форма на филаменти (мицелиум), кои не биле пронајдени во овие примероци. Покрај тоа, хемиските агенси што ги излачуваат габите за да ја разградуваат карпата, исто така, не биле откриени.
Наместо тоа, тимот верува дека тунелите биле создадени од колонии микроби, бидејќи тие се премногу широки за да ги формира еден организам. Калциум-карбонатната прашина пронајдена во тунелите често се излачува како метаболички отпад од микроби кои живеат во карпите. Сепак, иако биле откриени докази за нивното дејствување, фосилизирани остатоци од самите организми сè уште не се пронајдени.
Истражувачите ја исклучиле можноста овие структури да настанале поради хемиски или физички временски влијанија, бидејќи микроскопската анализа не открила траги од такви процеси. Хемискиот состав на примероците укажува дека создавачот на тунелите мора да бил биолошки ентитет.
„Бидејќи ниту еден познат хемиски или физички механизам на ерозија не може да го објасни овој феномен врз основа на микроскопската и геометриската анализа, сметаме дека тунелите имаат биолошко потекло“, заклучиле Пашиер и неговиот тим.
Иако микроорганизмите што ги создале овие тунели најверојатно одамна исчезнале, останува прашањето дали нивните потомци сè уште постојат некаде, незабележани, копајќи нови тунели што допрва ќе ги откриеме, пренесува Popular Mechanics.
