Додека денешните Ultra премиум смартфони далеку ја надминуваат цената од 1.000 евра, Poco F7 Ultra ќе чини 750 евра и ќе има практично – сè.
Poco за првпат претстави „Ultra“ телефон кој сигурно ќе ги загрижи производителите чии врвни модели чинат над 1.000 евра. Станува збор за моделот Poco F7 Ultra, кој доаѓа на пазарот со најмоќниот мобилен процесор на Qualcomm – Snapdragon 8 Elite. Овој чип, во споредба со Snapdragon 8 Gen 3, нуди 45% побрз процесор (CPU) и 40% помоќен графички процесор (GPU).
Посебно треба да се истакне дека Poco F7 Ultra е првиот телефон на брендот со посветен графички чип – VisionBoost D7. Според Poco, овој 12-нанометарски чип овозможува зголемување на резолуцијата, подобрување на FPS и Game HDR функција. Интересно е што не работи само во игрите, туку и на YouTube и Netflix.
Сепак, неговата моќ најмногу се забележува во игрите. Внатрешните тестови на Poco покажуваат дека Snapdragon 8 Elite и VisionBoost D7 заедно можат да ја извршуваат играта Genshin Impact во 2K резолуција при 120 FPS, без пад на перформансите дури и по еден час играње. Во тоа помага и технологијата LiquidCool 4.0, систем со двоен канал и голема цевка за ладење, кој ветува намалување на температурата на чипот за 3°C.
Но, ова не се единствените прилагодени чипови. Poco F7 Ultra располага и со Surge G1, кој управува со батеријата од 5.300 mAh, како и со Surge P3, кој се грижи за полнењето. Овие чипови го продолжуваат животниот век на батеријата, а од Poco тврдат дека таа ќе задржи најмалку 80% од оригиналниот капацитет по 1.600 циклуси на полнење – што е импресивно. Батеријата поддржува 120W жично и 50W безжично полнење, нешто што веќе станува стандард кај кинеските производители.
Што се однесува до камерите, Poco F7 Ultra ја има најнапредната камера досега меѓу Poco телефоните. Главниот сензор е 50 MP Light Fusion 800, способен да симулира различни фокусни должини (35 мм и 48 мм) и доаѓа со оптичка стабилизација на сликата (OIS). Покрај тоа, има 50 MP телефото сензор со „лебдечка“ леќа што овозможува 2,5x оптички и 5x дигитален зум, исто така со OIS. Системот го заокружуваат 32 MP ултраширока камера и 32 MP селфи камера.
Poco F7 Ultra располага со 6,67-инчен OLED екран со 120 Hz освежување, резолуција од 1.440 x 3.200 пиксели и поддршка за 12-битни бои. Осветленоста достигнува 1.800 нити, а во одредени услови може да се зголеми и до 3.200 нити. Покрај тоа, има PWM затемнување со фреквенција од 3.840 Hz, што овозможува 16.000 нивоа на осветлување, како и одзив од 480 Hz кој во игри се зголемува до 2.560 Hz. Телефонот е заштитен со новото Poco Shield Glass, а има и IP68 сертификат за отпорност на вода и прашина.
Од останатите карактеристики, треба да се спомене ултразвучниот сензор за отпечаток под екранот, NFC, инфрацрвен сензор, двочестотен GPS и стерео звучници. Телефонот ќе биде достапен во жолта и црна боја, со две конфигурации: 12 GB RAM + 256 GB меморија и 16 GB RAM + 512 GB меморија. Основниот модел ќе чини 749 евра, додека најмоќната верзија ќе биде 799 евра.
