Три тајни руски воени сателити лансирани оваа година, привлекоа големо внимание од страна на аналитичарите и истражувачите на вселената
Сателитите, означени како Космос 2581, 2582 и 2583, биле испратени во орбитата со ракетата “Сојуз-2.1В” од космодромот Плесецк рано на 2 февруари 2025 година. Од тогаш, тие покажуваат интересно однесување.
Се наоѓаат на околу 585 километри над Земјата, а нивната точна намена засега е непозната.
Во март, се забележало дека сателитите можеби изведуваат маневри во близина на други објекти во вселената, изјави астрофизичарот Џонатан Макдауел, кој следи активности на вселенски летови.
Подоцна, Американските вселенски сили идентификуваа нов објект во орбитата, кој најверојатно бил испуштен од Космос 2581 на 18 март.
Тајна мисија без официјални информации
Русија не откри детали за своите сателити и нивната мисија, бидејќи многу вселенски операции се тајни.
Испуштениот објект може да има повеќе намени, вклучувајќи:
• Воени експерименти, како инспекција на други сателити или вежбање таргетирање
• Тестирање на технологии за летање во формација
• Научни истражувања
• Ненамерна фрагментација, иако во таков случај би се појавиле повеќе парчиња остатоци
Ознаката „Космос“ се користи уште од 1962 година, најпрво од СССР, а сега и од Русија за различни воени и научни експерименти. Овие сателити се користеле за експериментални, тајни и воени програми, вклучувајќи антисателитски (ASAT) тестови, сателитска инспекција, извидување и електронско разузнавање.
Што ќе се случува понатаму?
Трите сателити летаат во формација, што не е невообичаено. САД и Кина исто така лансирале слични групи на сателити, за кои се смета дека се користат за електронско разузнавање.
Останува да се види каква улога ќе има новиот објект и што ќе направат сателитите Космос во наредниот период.
